Stock News: சென்செக்ஸ் 400+ புள்ளிகள் உயர்வு - பங்குச் சந்தையில் ஏற்றம் தொடருமா?

சர்வதேசப் போக்குகளின் தாக்கம் மற்றும் வெளிநாட்டு முதலீட்டாளர்கள் காட்டி வரும் ஆர்வத்தின் காரணமாக, நான்காவது நாளாக இந்திய பங்குச் சந்தைகளில் சாதகமான சூழல் நிலவுகிறது. சென்செக்ஸ், நிஃப்டி புள்ளிகள் வெகுவாக உயர்ந்து வருகின்றன.

Thursday March 20, 2025 , 2 min Read

சர்வதேசப் போக்குகளின் தாக்கம் மற்றும் வெளிநாட்டு முதலீட்டாளர்கள் காட்டி வரும் ஆர்வத்தின் காரணமாக, நான்காவது நாளாக இந்திய பங்குச் சந்தைகளில் சாதகமான சூழல் நிலவுகிறது. சென்செக்ஸ், நிஃப்டி புள்ளிகள் வெகுவாக உயர்ந்து வருகின்றன.

மும்பை பங்குச் சந்தையில் இன்று (மார்ச் 20) காலை வர்த்தகம் தொடங்கும்போது, சென்செக்ஸ் 478.13 புள்ளிகள் உயர்ந்து 75,927.18 ஆக இருந்தது. அதேவேளையில், தேசிய பங்குச் சந்தையில் நிஃப்டி 149.1 புள்ளிகள் உயர்ந்து 23,056.70 ஆக இருந்தது.

தொடர்ந்து 4-வது நாளாக பங்குச் சந்தை வர்த்தகம் ஏற்றம் கண்டு வருவது முதலீட்டாளர்கள் மத்தியில் மகிழ்ச்சியைத் தந்துள்ளது.

இன்று முற்பகல் 11.40 மணியளவில் சென்செக்ஸ் 446.73 புள்ளிகள் (0.59%) உயர்ந்து 75,895.77 ஆகவும், நிஃப்டி 143.50 புள்ளிகள் (0.63%) உயர்ந்து 23,051.10 ஆகவும் இருந்தது.

காரணம் என்ன?

அமெரிக்க ரிசர்வ் வங்கி தனது வட்டி விகிதத்தை மாற்றமின்றி நீடிக்கச் செய்துள்ளது சாதகமான சூழலை ஏற்படுத்தியுள்ளது. அமெரிக்க பங்குச் சந்தை ஏற்றத்துடன் நிறைவு பெற்றது. ஆசிய பங்குச் சந்தைகளைப் பொறுத்தவரையில் சியோலில் ஏற்றமும், ஷாங்காய் மற்றும் ஹாங்காங்கில் இறக்கமும் நிலவுகிறது.

சர்வதேச போக்குடன், வெளிநாட்டு முதலீட்டாளர்கள் மீண்டும் இந்தியப் பங்குச் சந்தைகளின் ஆர்வம் காட்ட தொடங்கியிருப்பதால் சென்செக்ஸ், நிஃப்டி புள்ளிகள் தொடர்ந்து ஏற்றம் கண்டு வருகின்றன. இந்த சாதகப் போக்கு நீடிக்கும் என எதிர்பார்க்கப்படுகிறது.