Gold Rate Chennai: அடங்க மறுக்கும் தங்கம் விலை - 5 நாளில் ரூ.1,400 உயர்வு!

ஆபரணத் தங்கத்தின் விலை நாளுக்கு நாள் அதிகரித்து புதிய உச்சத்தை எட்டி வருகிறது. கடந்த 5 தினங்களில் மட்டும் சவரனுக்கு ரூ.1,400 அளவில் உயர்ந்துள்ளது பொது மக்களிடையே அச்சத்தை கூட்டியுள்ளது.

Saturday March 29, 2025 , 2 min Read

ஆபரணத் தங்கத்தின் விலை நாளுக்கு நாள் அதிகரித்து புதிய உச்சத்தை எட்டி வருகிறது. கடந்த 5 தினங்களில் மட்டும் சவரனுக்கு ரூ.1,400 அளவில் உயர்ந்துள்ளது பொது மக்களிடையே அச்சத்தை கூட்டியுள்ளது. வாரத்தின் கடைசி நாளான இன்றும் தங்கம் விலை உயர்ந்துள்ளது.

சென்னையில் வெள்ளிக்கிழமை சில்லரை விற்பனைச் சந்தையில் 22 காரட் தங்கம் 1 கிராமின் விலை ரூ.105 உயர்ந்து ரூ.8,340 ஆகவும், ஒரு சவரன் விலை ரூ.840 உயர்ந்து ரூ.66,720 ஆகவும் இருந்தது. அதேபோல், 24 காரட் சுத்தத் தங்கம் 1 கிராம் விலை ரூ.114 அதிகரித்து ரூ.9,098 ஆகவும், சவரன் விலை ரூ.912 உயர்ந்து ரூ.72,784 ஆகவும் இருந்தது. இந்நிலையில், தங்கம் விலை சவரனுக்கு ரூ.67,000-ஐ எட்டும் வகையில் மீண்டும் உயர்ந்து வருகிறது.

தங்கம் விலை நிலவரம் - சனிக்கிழமை (29.3.2025):

சென்னையில் இன்று சில்லரை விற்பனைச் சந்தையில் 22 காரட் தங்கம் 1 கிராமின் விலை ரூ.20 உயர்ந்து ரூ.8,360 ஆகவும், ஒரு சவரன் விலை ரூ.160 உயர்ந்து ரூ.66,880 ஆகவும் இருக்கிறது. அதேபோல், 24 காரட் சுத்தத் தங்கம் 1 கிராம் விலை ரூ.22 அதிகரித்து ரூ.9,120 ஆகவும், சவரன் விலை ரூ.176 உயர்ந்து ரூ.72,960 ஆகவும் உள்ளது.

வெள்ளி விலை:

சென்னையில் இன்று (29.3.2025) 1 கிராம் வெள்ளி விலை ரூ.1 குறைந்து ரூ.113 ஆகவும், ஒரு கிலோ வெள்ளி விலை ரூ.1,000 குறைந்து ரூ.1,13,000 ஆகவும் விற்பனை ஆகிறது.

காரணம் என்ன?

சர்வதேச பொருளாதார சூழல், ரூபாய் மதிப்பு உள்ளிட்ட காரணிகளால் தங்கம் விலையில் மாற்றம் ஏற்படுகிறது. தற்போது டாலருக்கு நிகரான ரூபாய் மதிப்பு தடுமாற்றத்துடன் காணப்படுகிறது. அமெரிக்காவின் புதிய வரி விதிப்பு நடவடிக்கைகளால் சர்வதேச அளவில் வர்த்தக தடுமாற்றங்கள் நிலவுகின்றன.

குறிப்பாக, வாகன இறக்குமதி மீதான அமெரிக்க அதிபர் ட்ரம்ப் அரசின் வரி விதிப்பு நடவடிக்கைகள் இப்போது பங்குச் சந்தைகளில் எதிரொலிக்கத் தொடங்கியுள்ளன. இதனால், மீண்டும் பாதுகாப்பு கருதி தங்கத்தின் மீது முதலீடு செய்வதில் முதலீட்டாளர்கள் தீவிரம் காட்டி வருகின்றனர். இதனால், தங்கத்தின் தேவை அதிகரித்து ஆபரணத் தங்கம் புதிய உச்சங்களை நோக்கி விரைந்து பயணிக்கத் தொடங்கியிருக்கிறது.